– शेतकऱ्यांच्या आयुष्यात सुख-समृद्धी, समाधानाचे दिवस येण्यासाठी राजेंनी घातले श्री गणरायाला साकडे
विदर्भ क्रांती न्यूज
गडचिरोली : अहेरी राजमहालाच्या भव्य पटांगणात अहेरी इस्टेटचे राजे तथा माजी पालकमंत्री राजे अम्ब्रिशराव आत्राम यांनी मंगळवारी संध्याकाळी गणेश चतुर्थीचा मुहूर्तावर आपल्या परिवारासह “अहेरीचा राजा” ह्या मानाच्या गणरायाचे विधिवत पूजन व आरती करून प्रतिष्ठापना केली. गडचिरोली जिल्ह्यातील सर्वसामान्य शेतकऱ्यांचा आयुष्यात सुख-समृद्धी आणि समाधानाचे चांगले दिवस येऊ दे, गडचिरोली जिल्ह्याची प्रगती झपाट्याने होऊ दे, यासाठी आमच्या प्रयत्नांना बळ देण्याचे साकडे माजी पालकमंत्री राजे अम्ब्रिशराव आत्राम यांनी श्री गणरायाला घातले.
दरवर्षीप्रमाणे यंदाही माजी पालकमंत्री राजे अम्ब्रिशराव आत्राम यांच्या राजमहाल पटांगणात गणरायांचे आगमन झाले. माजी पालकमंत्री राजे अंब्रिशराव आत्राम त्यांच्या आई राजमाता रुख्मिणीदेवी, लहान बंधू अवधेशराव बाबा यांनी श्री गणेशाची विधिवत पूजा व आरती केली. यावेळी माजी पालकमंत्री राजे अम्ब्रिशराव आत्राम यांनी गडचिरोली जिल्ह्यातील जनतेला गणेशोत्सवाच्या शुभेच्छा दिल्या. आजचा दिवस उत्साहाचा असून, विघ्नहर्ता गणरायाचे सर्वत्र आगमन झाले आहे. गेल्यावर्षी निर्बंधमुक्त गणेशोत्सव साजरा झाला होता. यावर्षी देखील गणेशोत्सव उत्साह आणि आनंदात साजरा होत आहे.
विशेष बाब म्हणजे यावर्षी ‘अहेरीचा राजा’ म्हणून प्रसिद्ध असलेल्या गणेश मंडळातर्फे माजी पालकमंत्री राजे अम्ब्रिशराव आत्राम यांच्या मार्गदर्शनाखाली 20 ते 26 सप्टेंबरपर्यंत नि:शुल्क विविध स्पर्धांचे आयोजन करण्यात आले आहेत. त्यामध्ये एकल नृत्य, समूह नृत्य, लोकनृत्य/आदिवासी नृत्य, गायन स्पर्धा, भजन स्पर्धा, फॅन्सी ड्रेस स्पर्धा अशा अनेक स्पर्धा राजमहल अहेरी येथे घेण्यात येत आहेत आणि विजेत्या स्पर्धकांना राजेंच्या हस्ते विशेष पारितोषिक वितरण केले जाणार आहेत.
