विदर्भ क्रांती न्यूज
गडचिरोली : देसाईगंज तालुक्यातील विसोरा येथे आयोजित जिल्हास्तरीय विज्ञान प्रदर्शनाला शानदार सुरुवात झाली. या कार्यक्रमाचे उद्घाटन आमदार सुधाकर अडबाले यांच्या हस्ते करण्यात आले. अध्यक्षस्थानी आमदार रामदास मसराम होते.
या विज्ञान प्रदर्शनात विद्यार्थ्यांनी विविध शैक्षणिक, वैज्ञानिक प्रकल्प सादर केले, ज्यात तंत्रज्ञान, पर्यावरण संवर्धन, ऊर्जा साठवणूक आणि विविध नाविन्यपूर्ण कल्पनांचा समावेश होता. आमदार रामदास मसराम यांनी आपल्या अध्यक्षीय भाषणात विद्यार्थ्यांच्या प्रतिभेला वाव देण्यासाठी अशा प्रदर्शनांचे महत्त्व अधोरेखित केले. त्यांनी पुढील पिढीला वैज्ञानिक दृष्टिकोन वाढवण्यासाठी प्रेरित करण्याचे आवाहन केले.
उद्घाटक आमदार सुधाकर अडबाले यांनी विद्यार्थ्यांच्या कल्पकतेचे कौतुक करताना असे शैक्षणिक उपक्रम विद्यार्थ्यांच्या व्यक्तिमत्त्व विकासाला चालना देतात, असे सांगितले. या प्रदर्शनात जिल्ह्यातील अनेक शाळांनी सहभाग घेतला असून, शिक्षक, पालक आणि नागरिक यांची मोठी उपस्थिती होती.
कार्यक्रमाचे संयोजन शिक्षक व शाळा प्रशासनाने केले. विज्ञानप्रेमी विद्यार्थ्यांसाठी हा एक अनोखा अनुभव ठरला. विजेत्या विद्यार्थ्यांना पारितोषिक वितरणही करण्यात आले.
याप्रसंगी संस्थेचे अध्यक्ष नानाभाऊ नाकाडे, संस्थेचे सचिव भैय्याजी नाकाडे, विसोराचे सरपंच रमेशजी कुथे, उपशिक्षणाधिकारी विवेकजी नाकाडे, उपशिक्षणाधिकारी (माध्य.) अमरसिंह गेडाम, नरेंद्रकुमार कोकडे, गटशिक्षणाधिकारी पं. स. देसाईगंज, उपशिक्षणाधिकारी समग्र शिक्षा लता चौधरी, संस्था सदस्य चेतन नाकाडे, मुख्याध्यापक बी. ए. ठाकरे, विमाशि संघाचे जिल्हाध्यक्ष रविंद्रजी नैताम, नवघडे आदी उपस्थित होते.
