नमाद महाविद्यालयात आंतर महाविद्यालयीन मुलींची कबड्डी स्पर्धा

77

विदर्भ क्रांती न्यूज

गोंदिया : राष्ट्रसंत तुकडोजी महाराज नागपूर विद्यापीठाच्या क्रीडा आणि शारीरिक शिक्षण विभागाअंतर्गत गोंदिया शिक्षण संस्था द्वारा संचालित नटवरलाल माणिकलाल दलाल महाविद्यालयात आंतरमहाविद्यालयीन मुलींची कबड्डी स्पर्धा घेण्यात येत आहे.

गोंदिया शिक्षण संस्थेचे मार्गदर्शक प्रफुल्ल पटेल, अध्यक्षा वर्षा पटेल, सचिव राजेंद्र जैन, संचालक निखिल जैन यांच्या मार्गदर्शनाखाली 10 व 11 ऑक्टोबर 2022 असे दोन दिवस चालणाऱ्या आंतर महाविद्यालयीन मुलींच्या कबड्डी स्पर्धेचे उद्घाटन आज सीजे पटेल महाविद्यालय तिरोडाचे प्राचार्य डाॅ. मृत्यूजय सिंग यांच्या हस्ते करण्यात आले. कार्यक्रमाच्या अध्यक्षस्थानी नटवरलाल माणिकलाल दलाल महाविद्यालयाच्या प्राचार्या डाॅ. शारदा महाजन होत्या. प्रमुख अतिथी म्हणून डी. बी. सायन्स महाविद्यालयाचे प्राचार्य डाॅ. अंजन नायडू, जिल्हा संयोजक डाॅ. अश्विन चंदेल, बिरणवार, डाॅ. एजाज शेख, डाॅ. योगराज बैस, ठाकूर, रुकियाना यावेळी प्रामुख्याने उपस्थित होते. दीप प्रज्वलित करून कबड्डी स्पर्धेचे उद्घाटन करण्यात आले. यावेळी मार्गदर्शन करताना डाॅ. मृत्यूजंय सिंग म्हणाले, आजच्या तांत्रिक युगाच्या काळात युवक शारीरिक कसरतीपासून दूर जात असल्याने शारीरिक आजाराच्या समस्या निर्माण होत आहे. त्यामुळे प्रत्येक विद्याथ्र्याने मैदानी खेळ ही अत्यावश्यक गरज समजून खेळले पाहिजे, असे आवाहन डाॅ. सिंग यांनी केले. कार्यक्रमाच्या अध्यक्षस्थानावरून बोलताना डाॅ. शारदा महाजन म्हणाल्या, आजचा युवक मोबाईलमधील खेळाच्या आहारी गेला आहे. त्याचे दुष्परिणाम लगेच दिसून येत आहे. शारीरिक आणि मैदानी खेळामुळे शरिरासोबतच मन आणि बुद्धीचा विकास घडून येतो. त्यामुळे विध्यार्थ्यानी शिक्षणासोबत मैदानी खेळ ही आपल्या जीवनाचा अविभाज्य भाग बनवावे. गोंदिया जिल्हयातून मुलींचे ११ संघ जिल्हास्तरीय स्पर्धेत सहभागी झालेत, ही आनंदाची बाब आहे. परंतु, गोंदिया हा ग्रामीण भाग असल्याने संघाची संख्या जास्त अपेक्षित होती. मुलींसोबतच महाविद्यालयीन युवकांनी कबड्डी आणि खो खो सारख्या मैदानी खेळात सहभागी होऊन आपला शारिरिक आणि बौद्धिक विकास साधावा, असे आवाहन डाॅ. महाजन यांनी केले.
कार्यक्रमाचे प्रास्ताविक डाॅ. योगराज बैस चालन केले तर आभार डाॅ. परवीनकुमार यांनी मानले. जिल्हाभरातून 11 महाविद्यालयातील मुलींचे संघ या दोन दिवसीय कबड्डी स्पर्धेत सहभागी झाले आहेत. उद्घाटनीय सामना राजीव गांधी महाविद्यालय सडक अर्जुनी व एस. एस. जायस्वाल महाविद्यालय अर्जुनी मोरगाव यांच्यात झाला. स्पर्धेचा समारोप 11 ऑक्टोबरला होणार आहे.