– अजब-गजब विचार मंचाच्या वतीने यंदाही प्रकाशपर्व दीपावलीनिमित्त मिळणार सप्तसुरांची मेजवानी
विदर्भ क्रांती न्यूज
गडचिरोली : आपल्या विविध सांस्कृतिक, सामाजिक कार्यक्रमांच्या आयोजनासाठी प्रसिद्ध असलेल्या अजब-गजब विचार मंचाच्या वतीने यंदाही प्रकाशपर्व दीपावलीनिमित्त सप्तसुरांची मेजवानी मिळणार आहे. विशेष म्हणजे यावर्षीसुद्धा एक संध्याकाळी व एक पहाटे अशा दोन स्वरमैफलींची मेजवानी देण्यात येणार आहे. त्यामुळे सप्तसुरांचा हा डबल धमाका अवघी गडचिरोली नगरीच सूरमयी करणार आहे.
यंदा संगीत महोत्सव – २०२४ अंतर्गत अवीट गोडीच्या मराठी व हिंदी गीतांच्या दीपावली सांध्य मैफलीचे आयोजन करण्यात आले आहे. सोमवार, २८ ऑक्टोबर रोजी सायंकाळी ६ वाजता स्थानिक गडचिरोली- चंद्रपूर मार्गावरील विद्याभारती हायस्कूल तथा कनिष्ठ महाविद्यालयात आयोजित ही मैफल संगीत क्षेत्रात प्रसिद्ध इंडियन आयडाॅल कार्यक्रमाचा प्रथम विजेता सागर म्हात्रे, अंकिता टकले, सारेगमप फेम गीता पुराणिक, सूर नवा ध्यास नवा या संगीत कार्यक्रमात गाजलेला प्रणय पवार आपल्या सुमधुर सुरांनी सजवणार आहेत. रसिक या सूरमयी संध्येच्या सुरावटीत मग्न असतानाच मंगळवार, २९ ऑक्टोबरला पहाट स्वरांच्या दिव्याची पर्व ही खास पाडवा पहाट स्वरमैफल सुरांचा नजराणा सादर करणार आहे. ही मैफलसुद्धा विद्याभारती हायस्कूल तथा कनिष्ठ महाविद्यालयात होणार असून पहाटे ५ वाजता प्रारंभ होणार आहे. या मैफलीत दिग्गज गायक सागर म्हात्रे, प्रणय पवार, अंकिता टकले, गीता पुराणिक, मुकूल पांडे, गणेश भगत सुमधुर सुरांची मखमली पखरण करणार आहेत.
दोन्ही मैफलींचे संचालन रसिकांचे आवडते सुत्रसंचालक किशोर गलांडे करणार आहेत. अजब-गजब विचार मंच गडचिरोली ही जिल्ह्यातील नामांकित सामाजिक, सांस्कृतिक, क्रीडा, कला क्षेत्रात काम करणारी संस्था असून मागील ११ वर्षांपासून ‘दिवाळी पहाट’ या जिल्ह्यातील एकमेव कार्यक्रमाचे आयोजन करत असते. या कार्यक्रमाचा मुख्य उद्देश दिवाळी सणाच्या नागरिकांना संगीतमय मेजवानीने शुभेच्छा देणे तसेच उच्च दर्जाच्या नामांकित कलाकारांच्या कलेचा ‘याची देही… याची डोळा’ अनुभव घेण्याची संधी देणे तसेच भावी पिढीला सांस्कृतिक वारसा जपण्यास प्रोत्साहन देणे हा आहे. यात उत्कृष्ट कलाकार, उत्कृष्ट वाद्यवृंद, दर्जेदार शामियाना, ध्वनी यंत्रणा, उत्तम प्रकाश योजना असते.
या दोन्ही कार्यक्रमांत नागरिकांना मोफत प्रवेश राहणार आहे. या दोन्ही सूरमयी मैफलींना मोठ्या संख्येने उपस्थित राहून शब्दस्वरांचा आनंद घेण्याचे आवाहन अजब-गजब विचार मंचाचे सतीश त्रिनगरीवार, आशुतोष कोरडे, सचिन मून, अरविंद कात्रटवार, सतीश विधाते, नंदकिशोर काथवटे, विश्राम होकम, सुभाष धंदरे, मिलिंद उमरे, सूरज खोब्रागडे, प्रवीण खडसे, दत्तू सूत्रपवार, डॉ. प्रशांत चलाख, प्रतीक बारशिंगे व इतर आयोजकांनी केले आहे.
