– सहाय्यक प्रकल्प अधिकाऱ्यांना सीटू संघटनेचे निवेदन ; विविध मागण्यांचा समावेश
विदर्भ क्रांती न्यूज
गडचिरोली : सीटू संलग्नित आदिवासी विकास आश्रमशाळा शिक्षक व कर्मचारी संघटनेचे नागपूर विभागीय अध्यक्ष रामदास खवशी व जिल्हाध्यक्ष राधेश्याम पत्रे यांच्या नेतृत्वात शिष्टमंडळाने गडचिरोली एकात्मिक आदिवासी विकास प्रकल्प कार्यालयात मंगळवार, २८ जानेवारी रोजी भेट घेऊन आश्रमशाळा कर्मचाऱ्यांच्या विविध मागण्यांचे निवेदन सादर केल्यानंतर प्रकल्प स्तरावरच्या समस्या सोडवण्याचे व वरिष्ठ कार्यालय स्तरावरच्या समस्यांचा पाठपुरावा करण्याचे आश्वासन सहाय्यक प्रकल्प अधिकारी धनराज डबले यांनी दिले.
भेटीच्या वेळी कार्यालयाच्या वतीने कार्यालयीन अधीक्षक वासुदेव उसेंडी, कार्तिक कोवे, गुलाब बांबोळे, विशाल नन्नावरे उपस्थित होते. सादर केलेल्या निवेदनात उच्च माध्यमिक शिक्षकांना पदोन्नतीची संधी उपलब्ध करून देणे, शासकीय व अनुदानित आश्रम शाळेतील माध्यमिक व प्राथमिक शिक्षकांची अनुक्रमे ४८०० व ४३०० ग्रेड पे नुसार एकस्तर वेतन निश्चिती करणे, संघटनेचे पदाधिकारी व कार्यकारिणी सभासद यांना संघटनात्मक कार्यासाठी शासन निर्णयानुसार ७ दिवसाची विशेष नैमित्तिक रजा मंजूर करणे, नक्षलग्रस्त भागात देय असलेला प्रोत्साहन भत्ता सरसकट १ हजार ५०० रुपये करणे, सोनसरी शाळेतील कर्मचाऱ्यांचा रोखलेला वाहन भत्ता पूर्ववत सुरू करणे, अजूनही कामावर न घेतलेल्या मागील वर्षी कार्यरत रोजंदारी वर्ग ४ कर्मचाऱ्यांना पूर्ववत कामावर घेणे, थकबाकी रक्कम काढण्यासाठी वेतन अनुदान उपलब्ध करून देणे, कर्मचाऱ्यांच्या प्रतिनियुक्त्या रद्द करणे, अनुदानित आश्रमशाळेतील कर्मचाऱ्यांना अतिरिक्त घरभाडे भत्ता पूर्ववत लागू करणे, शासकीय निवासस्थान राहण्यायोग्य नसल्याने रांगी येथील शासकीय आश्रम शाळेतील महिला कर्मचाऱ्यांचे घरभाडे भत्ते अदा करणे, अधीक्षकांच्या रजा कालावधीत त्यांचा प्रभार अधीक्षिकांकडे सोपविणे, २०० पेक्षा जास्त विद्यार्थी अथवा विद्यार्थिनी संख्या असलेल्या ठिकाणी सहाय्यक अधीक्षक अथवा अधीक्षिका यांची नेमणूक करणे, अनुदानित आश्रम शाळेतील कर्मचाऱ्यांना डीसीपीएस हिशेबाच्या पावत्या देण्यात याव्या आदी मागण्यांचा समावेश आहे.
यावेळी शिष्टमंडळात संघटनेचे गडचिरोली प्रकल्प अध्यक्ष देव बन्सोड, भामरागड प्रकल्पाच्या अध्यक्षा सुरेखा तेलतुंबडे, सचिव डी. एस. घुटके, प्रसिद्धी प्रमुख सुधीर शेंडे, सहसचिव विकास जनबंधू, नागपूर प्रकल्प महिला आघाडी प्रमुख लक्ष्मी भेलवा, कोषाध्यक्ष आनंद शंखदरबार, सदस्य पुरुषोत्तम डोंगरवार, सुभाष लांडे आदींसह कर्मचारी बहुसंख्येने उपस्थित होते.
