– लॉयड्स मेटल्सने केला ‘ग्रीन गडचिरोली आणि इतर उपक्रमांचा शुभारंभ
विदर्भ क्रांती न्यूज
गडचिरोली : लॉयड्स मेटल्स अँड एनर्जी लिमिटेड (एलएमईएल) ने गुरुवारी जागतिक पर्यावरण दिन साजरा केला. यावेळी सुरजागड लोहखनिज खाण येथे विविध पर्यावरणपूरक उपक्रम तसेच गडचिरोली येथे ‘ग्रीन गडचिरोली’ उपक्रमाचा शुभारंभ आणि कोनसरी येथे एक कार्यक्रम आयोजित करण्यात आला.
एलएमईएलचे व्यवस्थापकीय संचालक श्री. बी. प्रभाकरन यांनी सुरजागड, कोनसरी आणि गडचिरोली येथील कार्यक्रमांना उपस्थिती लावली. उपस्थितांना संबोधित करताना त्यांनी भारताच्या विकासाच्या कथेशी सुसंगत गडचिरोली जिल्ह्यात ‘ग्रीन स्टील’ बनवण्याचे त्यांचे स्वप्न आहे असे सांगितले. खाणकामापासून ते वाहतुकीपर्यंत एलएमईएलने घेतलेल्या अनेक हरित उपक्रमांची त्यांनी यादी सादर केली. ते म्हणाले की, महाराष्ट्रातील पहिली आणि देशातील चौथी स्लरी पाइपलाइन पुढील काही महिन्यांत कार्यान्वित होईल. यामुळे जीवाश्म इंधनाच्या वापरावर आधारित रस्ते वाहतूक कमी होईल आणि कार्बन फूटप्रिंट देखील मोठ्या प्रमाणात कमी होईल. स्टील प्लांटची पायाभरणी लवकरच केली जाईल, असेही त्यांनी सांगितले. “आमचे एक स्पष्ट ध्येय आहे – कमी कार्बन उत्सर्जनासह स्टील बनवणे, समावेशक विकास करणे, नोकऱ्या, आरोग्यसेवा, शिक्षण यासारख्या अनेक उपक्रमांद्वारे स्थानिक समुदायाना सेवा देणे,” असे ते पुढे म्हणाले.
“‘ग्रीन गडचिरोली’ उपक्रमांतर्गत, गडचिरोली शहरात ३०,००० हून अधिक झाडे लावली जाणार आहेत. संपूर्ण गडचिरोली जिल्ह्यात ११ लाख झाडे लावण्याची योजना आहे. वृक्षारोपण शाश्वत राहावे यासाठी योग्य सर्वेक्षण आणि स्थळांची निवड इत्यादी केली जाईल,” असे श्री. बी. प्रभाकरन यांनी गडचिरोलीतील गोंडवाना विद्यापीठाच्या परिसरात ‘ग्रीन गडचिरोली’ उपक्रमाच्या शुभारंभप्रसंगी बोलताना जाहीर केले.
जिल्हा परिषदेचे मुख्य कार्यकारी अधिकारी सुहास गाडे; गोंडवाना विद्यापीठाचे संचालक प्रा. मनीष उत्तरवार ‘ग्रीन गडचिरोली’ उपक्रमाच्या शुभारंभ कार्यक्रमात व्यासपीठावर प्रामुख्याने उपस्थित होते. गाडे यांनी एलएमईएलच्या पर्यावरणपूरक उपक्रमांचे कौतुक केले आणि सांगितले की ‘ग्रीन गडचिरोली’ उपक्रम मुख्यमंत्री देवेंद्र फडणवीस यांच्या या वर्षी १० कोटी वृक्ष लागवडीच्या घोषणेशी सुसंगत आहे.
माजी प्रधान मुख्य वनसंरक्षक महिप गुप्ता यांनी प्रास्ताविक केले आणि एलएमईएलच्या विविध उपक्रमांमुळे काही वर्षांतच गडचिरोलीमध्ये कसे सकारात्मक बदल झाले यावर प्रकाश टाकला.
कोनसरी येथे श्री. बी. प्रभाकरन यांनी वृक्षारोपण मोहिमेची सुरुवात केली. त्यांनी एलएमईएलने कोनसरी येथील कर्मचाऱ्यांसाठी आणि त्यांच्या पत्नींसाठी आयोजित केलेल्या प्रेरक प्रशिक्षण कार्यशाळेला भेट दिली आणि सहभागींना भेटवस्तू वितरित केल्या.
सुरजागड येथे, लियूगॉन्गकडून पहिले भारत इलेक्ट्रिक व्हेईकल ग्रेडर आणि व्होल्वोकडून एलएनजी ट्रक एलएमईएल ला सुपूर्द करण्यात आले. तसेच सिम्युलेटर आणि पहिल्या इलेक्ट्रिक कॉम्प्रेसर एक्स्कॅव्हेटर ड्रिल रिगचे औपचारिक उद्घाटन ह्याप्रसंगी करण्यात आले.
श्री. बी. प्रभाकरन; उपविभागीय पोलिस अधिकारी शैलेश रांजणकर; विविध गावांतील सरपंच आणि उपसरपंच अरुणा सडमेक, वनिता कोरामी, नेवलुजी गावडे, राजू तिम्मा, मधुकर सडमेक, कल्पना आलम, गणेश गोटा, बापूजी गावडे, प्रशांत आत्राम, बलराम सोमनानी आणि एलएमईएलचे वरिष्ठ अधिकारी व्यासपीठावर उपस्थित होते.
ह्याप्रसंगी संबोधित करताना, श्री. प्रभाकरन यांनी गडचिरोलीतील कामकाजाकडे स्थानिक समुदायांना सक्षम बनविण्यासाठी आणि त्यांचे जीवन सुधारण्यासाठी वचनबद्धतेकडे सामाजिक आणि सांस्कृतिक गुंतवणूक म्हणून एलएमईएल कसे पाहत आहे यावर भाष्य केले. “स्थानिक समुदायांच्या सहकार्यामुळे आणि भक्कम पाठिंब्यामुळे एलएमईएल हे सर्व करू शकले. एलएमईएलचे व्यवस्थापकीय संचालक एक दिवस गडचिरोली मधून निर्माण व्हावे असे माझे स्वप्न आहे, कारण गडचिरोली निर्यात-गुणवत्तेच्या स्टील-निर्मितीचे उदयोन्मुख ठिकाण म्हणून जागतिक नकाशावर आले आहे,” असे ते म्हणाले.
कार्यक्रमादरम्यान, श्री. प्रभाकरन यांनी एलएलईएल च्या महिला कर्मचाऱ्यांना देण्यात आलेल्या ३५ ई-बाईक्सना हिरवी झेंडी दाखवली, सरपंच आणि उपसरपंचांना आरोग्य कार्ड वितरित केले. स्लरी पाइपलाइनचे काम कमीत कमी वेळेत पूर्ण केल्याबद्दल त्यांनी लोहखनिज ग्राइंडिंग युनिटच्या टीमला प्रशस्तीपत्रही दिले.
