– आमदार कृष्णाजी गजबे यांच्या पाठपुराव्याला यश
विदर्भ क्रांती न्यूज
गडचिरोली : आरमोरी मतदार संघासह संपूर्ण गडचिरोली जिल्हा आदिवासी, दुर्गम व नक्षलग्रस्त असून मोठ्या प्रमाणात जंगलव्याप्त असल्याने शेतकऱ्यांना रात्री शेतातील पिके ओलीत करताना प्रचंड अडचणीचा सामना करावा लागत होता. वन्यप्राणी व जंगली श्वापदांच्या हल्ल्यात अनेक शेतकरी व शेतमजुरांचा बळी सुद्धा गेला. त्यामुळे शेतकऱ्यांकडून कृषिपंपांना दिवसा १२ तास विज पुरवठा करण्याची पोटतिडकीने मागणी होत होती. सदर मागणीची आमदार कृष्णाजी गजबे यांनी तेवढ्याच तत्परतेने दखल घेत राज्याचे उपमुख्यमंत्री व ऊर्जामंत्री यांची मुंबई येथे भेट घेत कृषि पंपांना दिवसा १२ तास विज पुरवठा करण्याची आग्रही मागणी केली.
सदर मागणी व पाठपुराव्यामुळे आरमोरी मतदार संघासह संपूर्ण गडचिरोली जिल्ह्यातील कृषी पंपांना २८ नोव्हेंबर २०२३ पासून पुढील आदेशापर्यंत सकाळी ६ ते सायंकाळी ६ वाजेपर्यंत दिवसा १२ तास विज पुरवठा करण्याचा निर्णय घेण्यात आला. त्याबद्दल राज्याचे मुख्यमंत्री ना. एकनाथजी शिंदे, उपमुख्यमंत्री ना. देवेंद्रजी फडणवीस व ना. अजितदादा पवार यांचे आमदार कृष्णाजी गजबे यांनी आभार व्यक्त केले. सदर निर्णयामुळे आरमोरी मतदार संघासह संपूर्ण गडचिरोली जिल्ह्यातील शेतकऱ्यांमध्ये आनंदाचे वातावरण पसरले आहे.
